A1戰場 ~ 第八回 (新思維)
内附 : T4-16 ARS SET-UP SHEET @ PYC
 

 

由於近排都好多人問我關於車架/電子嘢既調教，所以今次我希望可以詳細分析返今場比賽既設定同心得，會比較詳盡少少，請見諒。⋯⋯

 

先講天氣，溫度36度，地面高達62度，絕對係考驗賽員/輪胎既能耐，不過我在此要感謝工作人員既付出，响高溫情況下工作，順利完成賽事，感激!!

今次既 control 呔，Teampowers 35xh，係 35! 你無睇錯，咁熱仲用 35 係有點那過，不過佢仍然都做到嘢，best lap 都夠快，但 drop 得好快!

所以駕駛風格上唔可以太進取，若你電頭用過咗，電尾係無可能守到快既時間，所以你要好好養呔 (即係就住揸)。呔水仍然係黄V3，切勿煲呔，搽 6~8 分鐘便可，响條 track 行兩三隻灣，就足以進入最佳狀態。

自從室內場開幕後，我好少响大場玩，有部份時間放响 1/10 carpet 既設定，另一方面，我又走咗去玩 1/24 mini car。先講 1/24，我去到 mini 車場，我只係一個新手，咩都唔識，幸好有場主同在場既高手指點下，都叫做玩到下，我提升咗不少反應，响 mini 場 5分鐘唔撞，係非常困難既事，所以當你响 mini 場訓練到少撞，當你出返大場既時候，你會覺得一切都變得容易，有大量既時間來比你收正，轉啲彎都比以前圓滑咗。另外，我响 mini 車架上，我係用咗 1隻好快既摩打，開頭我都覺得我係可以 handle 到，1/10 大車 4.5 開大 turbo 我都揸得掂，無理由 mini 5600kv 攪唔掂既，點知我真係攪唔掂，直至我調低咗極速既 end point，我先可以駕御得到架車。所以 1/24 令我提升咗駕駛既反應同埋摩打既調教。

今次既比賽，我大約操練咗3日，响第一日第一餅電既時候，我一心諗住練好一身好武功既情況下，約4分鐘既時候，發生咗一次嚴重意外，車架高速直射台底，二樓板 / 摩打 / 電池 / 電池架全部報銷! 幸好 T4 被譽為“裝甲車”，經一晚維修下，車架已回復原型。 响第二日既操練，我反復測試不同既摩打同電變既設定，我發現車速太快會令今次比賽既輪胎加快損耗，所以最後我選取用 Maclan 既 4.5R，因為佢既加速比我用開既摩打更加線性，加速來得柔滑，迫力更收放自如。

完成咗兩日既操練，大至上應該都無乜問題，我仲有時間整理咗張 setting sheet 比啲老友參考。咁啱我响 Facebook 見到 Xray 廠手 Bruno 部車係用 ARS，同埋較早前有位來自澳門既朋友問我關於 ARS 既設定，橫掂仲有一日試車時間，咁我就試下用 ARS 試跑，原本我自己嗰套 ARS 都用咗半年，所以我就問咗 "比利羊" 借咗佢嗰套，因為佢好少玩，所以成套 ARS 好少虛位同正型。最後我睇住 Bruno 張相參照返佢既設定，再加埋自己既感覺去調教部車。第一餅電，果然 lap time 有所提升，無咗以前難揸既感覺，整體時間都快咗，由其電尾仍然感覺實在。不過 ARS 仍然係唔可以太大動作去駕駛，過大動作，佢仍然係會好易甩尾。

當大家用 ARS 既時候，如果你想調教尾 Toe-in，係要好似原本咁替換 I.S.S. 粒粒才可，切勿用 ARS 推桿去調教，因為會改變ARS 既反應。所以當用 ARS 既設定時，應該要配合 set 車架使用，即是當你既 I.S.S. 粒粒設定為 2度，咁你用 Toe-in 尺量度都要係2度 (左右都係)，如果唔啱，先再用ARS推桿去調教，大家留意。

最後送上兩款 setting，如果有咩問題或唔明白，都歡迎大家詢問。