A1戰場 第十二回 (龍一)
内附 T4-16 SET-UP SHEET @ ACO

 

 

 

上星期日參加咗Michael攪既G force x EPS Race，地點係响粉嶺既ACO，而我今次夥拍一班PYC好友(Leo，Vincent，Dickson，華基，爆朱，Jackie等等......一齊參加，非常好玩。首先梗係多謝Michael先啦，Michael今次攪既比賽，有豐富既獎品同精美既獎盃! 仲有小禮物送，非常貼心。

 

而今集既主角，我原本好想加個名比佢，不過諗咗好耐都諗唔出，其實我地一直稱呼佢既名咪就係佢既網名囉，佢就係“龍一”。大家唔好誤會佢係“龍五”啲friend。 佢有解釋過比我聽點解叫“龍一”，不過我唔公開啦，想知既朋友自己問。

 

“龍一”我由沙埔村“Track Carena”年代已經識佢，佢嗰陣時都屬於一個新手。 但佢自從入咗TRC坐房之後，佢成績突飛猛進! 贏過大大少少既獎項，但近年佢忙於佢自己既事業，少咗出嚟比賽，不過今場車，佢仍然好輕鬆地攞到佢既TQA1，有幾輕鬆? 佢攞獎前同我講: “教練! 你睇我個車殼，一啲都無花”。 我嗰一刻，無言了! 不過“龍一”今次真係發揮得幾好。 所以抵比你贏既!