大家的RC: 5月 2018

安西賽車部 - KoPropo Advantage capacitor C (For Modify)

上場比賽試既第三樣産品就係呢一粒Cap, 相信大家玩stock motor既時候都會聽到啲高手話買粒靚cap(水塘)先至夠勁！但係好少聽到話玩快車(Modified)都要買粒cap, 呢一款KO既cap專門設計比Modified既摩打使用，說明書話…“會抑制過多扭力”。我見到咁神奇，即刻攞去試下，的而且確油門明顯容易撑握，減少咗好多不必要既空轉，試車時亦輕鬆做到好快既圈速及大時間。上一次比賽於低抓著力既賽道，亦幫助不少！神奇之處，係到咬地既時候，亦唔會話唔夠爆，大時間穩定性大大提高。售價亦算相宜。試過於不同廠既電變使用，效果都係一致地好。

安西賽車部～Bittydesign JP8評測

未試之前，我都有問過玩過啲人既評語，不竟我買既時候，呢隻殼絶對唔平！有啲人就會話係Racer同TypeS既中間，但我試咗之後反而JP8係呢三隻殼中最定嗰隻，佢既車殼面積係最闊，頭唇亦遍大，尾翼位置亦加咗兩條導風位，行駛時直線行駛相當穩定，灣道指向性亦高(因為前移咗10mm)，不過略嫌灣心表現偏慢。

反覆測試(已本人車架測試不作任何修改)，JP8做到既best lap唔係最快，不過係最穩，同埋亦算最易揸，如果再調教一下車架既設定，應該會更好。今場TeamPowers Cup冠軍都係用呢款車殼。喜歡與否都要視乎駕駛者既風格同設定。

希望呢個評測幫到大家對呢一個車殼既認識。

安西賽車部 - MKS Servo深入評測

試咗幾日終於可以同大家分享我既用後感，如果有行開賣直升機/飛機既舖頭，你應該會認識MKS呢個牌子，因為玩開”飛”既玩家都係要求非常精準既產品。而MKS亦推出X6系列比”車”用既高楷servo。適合電動或油動既1/8, 1/10既onroad或offroad用家。X6系列獨特之處係全部都用上日本頂級4極摩打作驅動，而4極摩打既優點係比2極摩打既扭力更高及慳電。
先介紹旗艦級既MKS X6 HBL599, 以6V計0.11s/ 30kg, 如果以7.4V計0.09s/ 38kg絕對屬頂級規格。而世界冠軍Ty Tessmann都係用呢款servo~! 另外一款X6 HBL575, 以6V計0.082s/ 18kg, 如果以7.4V計0.066s/ 22kg，速度其快~! 呢兩款servo都用上鈦合金齒，視乎你既需要選擇呢兩款servo，深信呢兩款servo响1/8車架有出色既表現。

而我測試嗰款X6 HBL575SL, 以6V計0.08s/ 13.3kg, 其規格以比其他大廠頂級servo優勝。第一次測試既感覺已經感受到零虛位既分別，指向性更高，甚至乎有啲想抽甩部車。調較一下支控既反應再作測試，感覺已經好轉。而我當日既測試成績比我原先既配置更快，輕鬆做到快時間。適逢上星期就係Team Powers Cup 2018，當然我會試下實戰既試驗。由於當日早上落下大雨，抓著力大減，車架沒有大幅調整。純粹改變揸法，亦因係咁，我更加體會到呢一隻servo既細緻度，亦幸運地以二車完成初賽。去到決賽，由於我錯判當日既Traction，最終以三車完成賽事。我亦滿意比賽當日既servo表現。

我對呢一隻servo既總結係反應快，直接，精準，沒有任何修飾，純粹表現返駕駛者既反應。如果鍾意精準度高既朋友，一定喜歡。講咗咁耐，大家都想知佢既售價，當然亦會係頂級既價錢，售價約千多元。我亦都講番貴價servo值唔值得投資，電變係控制你架車既前後，深信大家都知道平貴電變既分別，同樣servo係控制你架車既左右，所以servo細緻度既高低絕對影響你既圈速時間及穩定性。據了解X6系列servo會今個星期發售，有興趣既朋友，要落kws睇下。

http://www.mks-servo.com