安西賽車部 ～ 回歸 KO Propo

安西賽車部 ～ 回歸 KO Propo

先前做過呢枝控既評測，試過便知好，所以決定轉用呢枝控。

由第一枝槍控開始KO EX11, EX1 Mars R, Futaba 3PKS, 4PKS, 4PKSR, Sanwa M12。 今次再回歸KO EXRR，熱身咗幾排電，感覺係有所不同，轉灣反應提升不少，同埋呢款Lipo板，解決咗電量問題。

另外，由於上星期一掛住適應支新控，所以今個星期日，應該可以試T4 2018啦。



A1戰場 ~ 第十九回 "CETC 2017 香港站" 賽後感

A1戰場 ~ 第十九回 "CETC 2017 香港站" 賽後感

上星期日，又完成咗一場 CETC 賽事。 首先都要感謝賽會既安排，因為不穩定既天氣，比賽多次延誤，不過賽會都無話趕住收工咁，盡量令各位跑得幾多得幾多。希望下一次可以完成晒所有賽事，大家開開心心咁玩返兩日。

講返賽事，由於天雨關係，令第一日既賽事伸延到夜晚，Twin RC Speedway 夜晚既燈光應該需要再調節下，光暗位令部份賽員都表現失準，就算係世界級車手都有投訴呢一個問題，希望 Twins 可以攪攪佢，做到一個高質素既車場。

另外今次比賽既關鍵，係第一日賽事中，有無開到第二套新呔，因為每位賽員都可以用三套新呔應付兩日既比賽，而我地 PYC 第一 / 二 / 三 小隊，响第一日都只係用咗一套呔跑，留返兩套新呔响第三輪及第四輪初賽使用 ，可惜事與願違，受天雨影響，剩餘嘅初賽都取消了，只係可以用番第一日初賽嘅成績嚟決賽。

因為新呔同舊呔跑出嚟既時間分別好大，如用新呔跑會有三四秒既優勢，不過這就是比賽，自己策略錯咗，無得怨天尤人，唯有下次醒啲。

响第二日嘅比賽，由於天雨仍然不穩，足足坐咗六個鐘頭先可以比賽，不過呢六個鐘亦都冇白坐到， 我可以周圍同啲世界級車手取經，問佢地 set車 / 叉電既要點，遲啲我亦會同大家一一分享。

因為等得太耐，又睇完啲世界級車手既設定，又了無牽掛咁樣去跑我剩餘嘅B組決賽 ，所以把心一橫，就試下用一啲世界級廠手用緊嘅設定去跑第一輪決賽，果然有料到~!喺從未跑過嘅設定上，時間果然係有驚喜，比之前快咗0.4秒以上，不過亦都係由於車架大改嘅關係，導致有些少唔習慣，但去到第二輪嘅決賽開始把握到固中要點 ，但係亦都因為一啲小問題，導致未能完成第二輪決賽，但去到第三輪決賽，車架嘅設定已經習慣，完成到一個非常之快嘅時間 22圈 5:11.536

雖然失落於比賽嘅成績，但係今次嘅收穫比起獎牌來得更重要。因為知道車架原來係可以去到另一個層次，當然我會附上今次比賽嘅設定畀大家參考。

最後梗係多謝以下既人事：

借 Racer 殼比我既 “奥爺”
幫我拍起步照既 “風騷哥”
仲有包我全日飲食既 “就哥”

當然仲有我既贊助商

(唔開名啦，費事又話賣廣告) 我車殼已經有 show



今期流行

今期流行

呢兩個月, 全世界都關注緊 “無限精機” 嘅核試 (MTC1), 雖然遲咗十幾年, 但係震撼性, 話題性 同 娛樂性, 非常豐富!

“主編” 早前撞到老朋友, 招呼都未打, 佢就問會唔會介紹 MTC1, 我嘅回覆係……那有車? 佢嘅回覆係, 叫朋友借嚟睇下咪得囉!

我心想…… 如果唔能夠進入佢嘅靈魂, 狠狠咁砌佢一鑊, 揸住部車, 點樣講好呢? 因為無限好多 Fans, 好易講錯嘢, 上次 ARC 都係 PC Boy 自己講番。

好啦~ 月尾 Xray T4 2018 上市喇, 首先放低所有成見同關係, 站係一個觀眾嘅角度睇睇, 真係唔知乜野葫蘆賣乜野藥? 要等官方公佈多啲資料, 先至有得評論。

有啲人會將兩件事情串埋一齊睇, 好容易覺得兩大廠正式交手啦, 但係其實每年 Xray 呢個時候都會出新車, 所以又唔覺得太出奇。

今日有朋友同我講, 佢想等埋 Xray 先決定入乜貨, 我話好合理呀! 作為一個消費者, 貨比三家, 順便通知佢, 係香港代理訂車, 會有啲優惠, 但唔知係乜! 不過最起碼我哋 “大家的RC” 會介紹下部 T4 2018, 因為一早代理已經約咗我哋。

A1戰場 ~ 第十八回 坪輋猛龍

A1戰場 ~ 第十八回 坪輋猛龍

 

 

 

“龍一“你又再一次上到我既A1戰場! 無辦法，你响兩星期內攞咗兩次TQA1, 我都替你開心。 自從“龍一”無做serpent車手同埋因為個人事業停咗一排比賽，佢復出之後，反而技術更勝之前，贏既差距更大。 所以今場車，我地“第一小隊”有個目標就係想贏呢位長勝將軍，但最後當然又係被“龍一“再一次K.O. 其實响星期六既練習中，我地各人都跑得唔錯，試車時間絕對係有力同“龍一“匹敵，不過星期日traction既劇變，導致未能發揮到應有既水準。 反觀主場既車手完全無traction既變化而產生問題，所以我地都係要放多啲時間响ACO既場地變化!

由於兩次既比賽(RCF同埋GQ CUP RACE)都係用咗GQ control tire,所以佢既setting無乜變動。 今次佢部Yokomo BD8仲未裝到新既P.C.S., 佩上yokomo原裝碳板，大至上望落去無乜大改，不過“龍一“之後補充返佢頭尾波箱用咗“Target RC”既墊片升高咗1.5mm, 從而令到車架既滾動提升。 其他細節上既設定，睇返附上既setting sheet。

 



A1戰場~第十七回 “大開眼界”

A1戰場~第十七回 “大開眼界”

 

 

上星期過咗一個愉快既周末，重點不是成績，而係同一班志同道合既朋友一齊吃喝玩樂，講下笑，開開心心玩咗幾日，而仲要可以近距離接觸一班世界一線車手，欣賞佢地戰車既走姿，對比賽既態度，真係大開眼界! 而當然我地希望都可以學返一招半式，咁樣已經可以值回票價!

今次我地PYC第一小隊都有啲收穫(Keith/ Stock A6, PC Boy/ Mod C1)，另外PYC既Ali更加勇奪Stock組TQA2! 而大家的RC另一成員，Felix都攞返Mod B1。

而我今次以A9超額完成，賽前都係諗住做下報導，睇下車手咁，無諗過仲可以與世界頂級車手同場競技(當然最後都係响A陪跑)，但係今次既經驗確實獲益良多! 如果你有睇開我地既文章，我上回已經提及我“迷”緊，我真係迷失咗一段時間，跑過B組又跑過C組，好似突然無咗一啲手感。就係呢個moment有三位朋友扶一扶我，首先係PC Boy同埋Dicky，佢地兩個都指出咗我車速同車架既問題，發現就係我既車速過快/Brake唔跟手同埋車架過轉，呢幾個問題令我過往幾個月好似揸住一部瘋狂既車，最後我重新設定過所有設定，慢慢搵返自己既手感，放低自己既執著，接受別人既意見，重返正途! 另外一個朋友(唔開名啦)，就係比機會我狠狠的炒咗幾板桌球，令我响賽前信心大增，當然我會請返呢位老友食返餐。

 

入正題，講返車架設定，今次場地屬於high traction，對現今車架取向於扭動大既方向，會面對得更大既挑戰，如果用碳纖底板跑會面對更多既問題! (易cup車同埋追灣心) 所以我今次比賽用咗鋁底板作賽，一用上鋁底板，9成問題已經解決，不過鋁板唔夠碳板灣速快，所以今場TQA1既Akio都係用碳板作賽! 如果你照抄我既設定，你會發現我既設定係非常之容易揸，嚴格嚟講可以叫穩定地“慢”，但就係慢慢地咁跑，所以最後可以無miss跑到5分鐘，攞到初賽較高分既位置。 如果想進取啲，可以車尾改用2.6彈弓，灣速會爽好多!

 

另外，今次學到既係車呔既處理，佢地搽呔水同方法都有特定既方法，由於同一組既關係，可以近距離偷師，我每一次都早嗰佢地出去呔水區等佢地出嚟，發覺佢地每人都有一套處理車呔既方式，有啲就搽抹各三次，有啲就搽完等乾又再搽，最型嗰個梗係yokomo主設計師“海野”，正所謂，搽呔水都型過你! 不過有個共通點就係，佢地搽呔水既速度係超快，仲要係傾住計喎! 而今次比賽既車呔同呔水都算理想，無話一啲抽獎既車呔! 呔水亦都夠咬，無話電頭快電尾drop既情況，因為場地本身都係high traction既關係，就算舊呔都唔會話慢好多! 圈速快慢係取決於車架既設定同車手既反應!

 

今次既分享暫時咁多先，希望下一站或者其他既海外賽事，大家繼續努力，更加多香港既品牌或車手可以站响國際既舞台!

 



A1戰場 ~ 第十六回 “迷”

A1戰場 ~ 第十六回 “迷”

 

上星期又上演咗Teampowers Cup 2017，首先恭喜Jackie再下一城贏得冠軍。 不過今回既主角係我老友Barry Wu (阿就)，今場車“阿就”憑著努力既操練同埋獨特既設定下，取得今場既TQ，雖然未能已A1圓夢，最後已TQ/A3企响頒獎台上，可知道，贏你嗰兩個絕非等閒之輩，一個“Jackie”一個“龍一”，兩個都係穩定見稱，所以我個人覺得雖敗猶榮，希望你今次得到一場寶貴既經驗，下一場再殺過。

未講“阿就”既setting之前，首先講今場車既background先，今次選用既Control車呔仍然都同上一回Teampowers Cup一樣都係“32S”，理應大部份既賽員應該唔會對呢套呔陌生，不過今次比賽既traction比上一次高好多，而呢套呔响咁高traction下，產生既問題會更大，即係咩問題呢? 過咬通常係會“cup車”，但呢套呔係會“甩尾”，令到部份賽員感覺好“迷”，當然我唔係想講呢到呔係有問題，呢到呔如果你掌握得而，圈速同耐久性都係無問題，不過對一啲好轉既車架或者一啲高速入灣風格既車手會⋯⋯構成好大既影響。

而今次“阿就”用咗特別既設定去底銷咗呢個問題，基本上大部份既設定同大家差唔多，不過佢車尾部份係同好多人好唔同，仲要係非常冷門! 就係車尾脾碼用“尾插水”! 咩叫尾插水呢? 就係尾部既頭碼(RF)低過尾碼(RR)，咁有咩用呢? 呢個設定既特色係“off power steering significance increased” 即係收油同埋灣心既轉向會有所提升，當然出灣會下降，正好底銷咗呢套既入灣甩尾既問題。 而我响第三場都有跟呢一個setting去跑，的而且確係感覺車尾部份穩好多，但係同自己既駕駛風格唔太match，未能充分發揮到呢一款setting。不過阿就係反覆測試下搵到呢一個合適既setting，所以真係要比個“叻”佢!

 

除咗用“尾插水”可以解決呢一個車頭“過咬”既問題，而另外“龍一”都有另一個方法去解決(其實係“米高羊”試出嚟)，就係選用一啲比較穩定既彈弓，(唔好用一啲太過有progressive反應既彈弓) e.g. Race opt Orange/ Axon Linear 2.8/ Xray Linear 2.7 etc.... 以上嗰啲彈弓都可以解決車頭過咬既問題。 另外，如果你係用PSS油壓既朋友，用返原本1.1x4孔既油壓都可以減輕呢一類既問題，仲有車尾彈弓都不宜用較輕既度數，用一啲硬既彈弓都可以撐住車尾，無咁易甩尾。 所以我另外一個老友Dicky用咗我提供比佢既solution去比賽都响決賽中取得唔錯既成績同圈速。 咁最後點解我本人又跑得咁差? 因為我自己响嗰一刻同其他既朋友一齊“迷”緊。 唯有屢敗屢戰~! 希望今次既分析可以幫到對呢場比賽發揮得唔好既朋友啦!

 

 



安西賽車部 (Reedy Blackbox 510R + Reedy Sonic Mach3)

安西賽車部 (Reedy Blackbox 510R + Reedy Sonic Mach3)

內附Teampowers cup T4 starting setup

 



上星期除咗測試咗車殼同鋁底板之外，就係重點測試咗Reedy新款電變同摩打。 先講摩打，今次試咗Modified既4.5R，從外觀上，實而不華既設計，黑色鏤空鋁殼，全金屬既sensor尾蓋，磁力屬於中性，中尾段加速唔錯，相比舊款Reedy既摩打，造功無乜挑剔既地方，隨摩打跟埋既扁身sensor線，未必適合touring使用(略長)，不過Reedy既市場定位都係on/offroad兼備。

而Reedy既新款Blackbox 510R，外型上唔會有太大既驚喜，都係大路穩陣既設計，全黑色鋁殼，預計安裝30mm既風扇，唔需要加adaptor之類既嘢，不過風扇並不包括在內，需自行另購。但係電變既“設定盒”係跟埋(都好過無)。 先講設定上既細節先，較中位係同其他品牌有別，緊記細閱說明書既細節(其實唔係好難)。 調好中位之後，就試用自己沿用既數據去調教設定，齒比大約7.74，先試第一餅電，摩打感覺好線性，頭中斷唔會過爆，而電變亦唔算高溫，之後再慢慢調教brake既detail位，呢一款電變對brake既調教係最豐富既，Brake Frequency基本上係現今頂級電變應有既設定，而Reedy仲要細分Drag Brake frequency同普通Brake frequency，因應車手既手感同摩打既特性，從而改變brake/ drag brake既調換。 另外其餘既大路設定，當然都可以响Reedy度調教。 再試多幾餅之後，再試用英國廠手Chris Grainger既設定再試，感覺上再柔順，加速更線性，最重要係圈速有明顯既進步。

 

今次對呢一個電變既評分如下(10分滿分):

外型: 電變7分 摩打8分

調教: 電變9分 摩打n/a

性能: 電變8分 摩打8分

整體上，Reedy 510R屬於高階型既電變，新手未必可以完全發揮到電變既可調性，不過官網有不同場地車架既設定表可供下載，同埋說明書都有對每一項調教作出解說，所以Reedy電變同摩打係一個唔錯既選擇。

 

最後梗係上埋今個星期既甜品，就係我嚟緊星期日比賽既T4 2017設定表，暫時都幾滿意，希望星期日會有好表現~!

 

 

 



安西賽車部 (Bittydesign M410車殼/ Xray T4 鋁底板Asphalt)

安西賽車部 (Bittydesign M410車殼/ Xray T4 鋁底板Asphalt)

 

响上星期試咗好多新產品，首先送上啲頭盤先，介紹下新嗰隻Bittydesign既M410房車殼，响我既測試期間有幸遇到Eagle Power Shop揸弗人“Michael”借咗佢隻試板Bittydesign M410車殼(當時仲未有得賣)，外型上都係同大路既房車殼無乜大分別，不過車頭燈位置有好深既陷入位，同埋車頭比較直無LTCR咁斜，試跑咗一轉，係有啲驚喜，比想像中轉(因為之前有人話偏推)，而佢轉得嚟比LTCR更穩定，不過車殼尾翼座位置有啲薄弱，希望賣街既板本有改善到呢個問題。據消息，“風騷哥”都買咗隻仲要噴埋車花，我都要入返隻先。

 

第二個頭盤就係試咗响“立青”asphalt地用鋁底板，因為個人認為鋁底板應該係响好高traction下先會發揮得到，不過自從上一個月“華基一役”之後，“華基”話比大家聽鋁底板响唔咬既情況下都可以發揮得到，所以PYC多咗好多人去搶購同用鋁底板玩車。咁我當然都要去求證下，由於我嗰部T4係原本攞嚟跑地毯場，車架上無乜太大既修改，換⋯⋯一換彈弓同肶碼既膠粒就攞去Asphalt場跑，跑咗幾個圈感覺竟然係唔覺自己跑鋁底板，再細心揸下感受下車架既動態，開始搵到揸鋁板既手感，再試多幾餅電後，發覺鋁底板原來响唔太咬既程況下都幾好跑，圈速時間都好搵定，有啲平時碳板會出現問題既位置，响鋁板度係唔會出現。不過另一個問題我就發現到，鋁底板自己跑係無乜大問題，不過行既線位無碳板咁靈活多變，我需要多啲時間去測試，希望下一次可以再同大家做更深入既評測。

 

過兩日會奉上主菜，記住緊貼我地既channel。